खड्काको पशुपति आर्यघाटमा अन्तिम संस्कार गरियो

काठमाडौं, चैत १८। का‌ंग्रेसका नेता एवं पूर्वगृहमन्त्री खुमबहादुर खड्काको पशुपति आर्यघाटमा अन्तिम संस्कार गरिएको छ ।

खड्कालाई सशस्त्र प्रहरीको टुकडीले सलामी अर्पण गरेको थियो । खड्का पूर्वगृहमन्त्री भएकाले उनलाई सशस्त्रले सलामी दिएको हो । श्रद्धाञ्जली दिन पार्टी सभापति शेरबहादुर देउवासहित काँग्रेस नेताहरु, अन्य दलका नेताहरु तथा शूभचिन्तकहरु आर्यघाट पुगे ।

नेता खड्कालाई छोरा अनुरागले दागबत्ती दिए । अनुराग बेलायतबाट आउँदा भारतबाट फ्लाइट छुटेपछि आउन ढिला गरेका थिए । उनी आउन ढिलाई गर्दा पार्टी कार्यालयमा दिइएने श्रद्धाञ्जलीको कार्यक्रम फेरबदल गर्नु परेको थियो ।

विहान ९ बजेपछि पार्टी कार्यालय लगिने भनिएकामा अनुराग ढिला आएपछि दिउँसो ढिलो गरी मात्रै खड्काको पार्थिव शरीर श्रद्धाञ्जलीका पार्टी केन्द्रीय कार्यालय सानेपा लगिएको थियो । पार्टी कार्यालयमा झण्डै एक घण्टा राखिएको थियो ।

शनिबार राती अबेर दिल्लीबाट ल्याएपछि खड्काको पार्थिव शरीर सानेपास्थित घरमा राखिएको थियो । विदेशमा भएको छोरा आउन ढिलाई भएका कारण खड्काको शव घरमा बढी समय राखिएको हो ।
यसअघि, कांग्रेस केन्द्रीय कार्यसमितिको आइतवार बसेको आकस्मिक बैठकले केन्द्रीय सदस्य, पूर्वमहामन्त्री तथां पूर्वमन्त्री खड्काको निधनप्रति दुःख व्यक्त गर्दै शोक प्रस्ताव पारित गरेको थियो । खड्काको चैत १६ गते साँझ भारतको नयाँ दिल्लीस्थित एपोलो अस्पतालमा उपचारमै रहँदा निधन भएको थियो ।